Får stipend for å skriva nynorsk sakprosa for barn

Skrive av Svein Olav Langåker.

Åsmund H. Eikenes fekk stipendet av Magne Aasbrenn, leiar i Noregs Mållag. Foto: Noregs Mållag

Åsmund Husabø Eikenes får 50.000 kroner i nynorskstipend for å skrive sakprosabøker for barn.

– Utgjevingane er med på å bøte på eit problem vi i Mållaget har sett lenge, nemleg at det er ein stor mangel på sakprosabøker på nynorsk for barn, seier Magne Aasbrenn, leiar i Noregs Mållag.

Manglar sakprosa om naturfag på nynorsk

Åsmund H. Eikenes har ein doktorgrad i cellebiologi frå Universitetet i Oslo, og har tidlegare jobba som forskingsjournalist i Framtida.no. I 2016 gav han ut boka Handboka. Alt du vil vite om hendene dine – og litt til, og i august kjem han med ei populærvitskapleg bok om kroppsvæsker.

– Eg er veldig takknemleg. Sakprosa for barn inspirerer mange til å lesa. Sakprosa er også viktig for identitetsbygginga til barna, seier Eikenes. Han er glad for å få høve til å fylla eit tomrom innan sakprosaen.

Målgruppa for dei to illustrerte bøkene han no skal skriva, er barn i alderen mellom seks og ni år.

Begeistra

Kvart år deler Noregs Mållag ut to nynorskstipend på 50.000 kroner. Midlar til stipenda får vi av Kulturdepartementet, og føremålet er å hjelpe fram gode prosjekt som kan fremje nynorsk på alle samfunnsområde.

– Vi veit at alle små, nysgjerrige småskolebarn vil få tilgang til fagleg fundamentert informasjon på nynorsk, og derfor er vi begeistra for å dele ut det eine nynorskstipendet for 2018 til Åsmund H. Eikenes, seier Magne Aasbrenn.

Stiftinga Pirion v/Svein Olav Langåker, Midthaugen 5, 5411 Stord. Telefon 94 87 53 65. Epost Denne e-postadressa er beskytta mot program som samlar e-postadresser. Du må aktivere javaskript for å kunne sjå den. Org.nr 983 173 276.  MELD DEG PÅ NYHENDEBREV HER!

Pirion får støtte av Fagforbundet og KLP gjennom Landssamanslutninga av nynorskkommunar. Utdanningsdirektoratet støttar òg Pirion.