Ei bok som set kjenslene i sving

Skrive av Svein Olav Langåker.

Christian Wiik Gjerde har du sikkert sett på NRK Super. Denne våren kom han med barnebok. Foto: Christian Raabe/Samlaget

Forfattar Christian Wiik Gjerde tar kjensler på alvor, og gjer dei til ein del av spenninga i «Jakta på firkløveren».

 

Det er sommarferie og skulefri. Alvar og Jens badar med Gulla, leitar etter firkløver, har klubbmøte i trehytta – ja, dei gjer alt det kjekke ein kan gjere på ei øy uti havgapet. Men når ein ny gut flyttar til øya, blir det sjalusi, krangel og forviklingar. Alvar må finne den vesle helten i seg, og det litt kjapt.

Forfattar Christian Wiik Gjerde tar kjensler på alvor, og gjer dei til ein del av spenninga i boka. Det er kanskje det eg likar best med boka.

Boka er sjarmerande, morosam, spennande og rørande. I ein fotballkamp mellom dei tre gutane er det ikkje langt frå gapskratt til medynk.

Av og til kan nok boka verka litt lang, og nokre ting kunne nok kuttast og fortettast. Men når boka til slutt er ferdig, så vil me gjerne ha meir. Åtteåringen min blei heilt hekta på boka, og håpar på meir. Det gjer eg òg.

Boka passar til høgtlesing for dei fleste aldrar, vil eg tru.

Les fleire bokmeldingar her!

Stiftinga Pirion v/Svein Olav Langåker, Midthaugen 5, 5411 Stord. Telefon 94 87 53 65. Epost Denne e-postadressa er beskytta mot program som samlar e-postadresser. Du må aktivere javaskript for å kunne sjå den. Org.nr 983 173 276.  MELD DEG PÅ NYHENDEBREV HER!

Pirion får støtte av Fagforbundet og KLP gjennom Landssamanslutninga av nynorskkommunar. Utdanningsdirektoratet støttar òg Pirion.